TAKHNO (ANKLES) SE NEECHE LIBAAS !

Bismillahirrahmanirraheem




TAKHNO (ANKLES) SE NEECHE LIBAAS !



Wah shakhs kaamyaab wa kaamraan ho gaya jisne apni dunyawi zindagi ko islam ke saanche me mukammal dhaal liya aur allah wa rasool sallalaho alaihi wasallam(pbuh) ki itaat ka huqm baja laaya..


Lekin aaj ham nafarmanio par nafarmaniyan karte chale jaate hai aur dil hai ke ahsaas karta hi nahi aur ahsaas bhi ho to kyon!

Jabke siyaah kaariyon ke ahsaah par dhool jam chuki hai,


unhi siyaah kaarnaamon mese ek ye hai ke aaj ham libaas jaisi allah ki azeem nemat aur saamaan e zeenat me be'parwaahi ka shikaar ho chuke hain,

maujoodah waqt ke libaas ki tamaam kharaabion ko nazar'andaaz karte hue, agar aap sirf asbaal (pajama, lungi, pant wagerah se neeche pahanne) par ghaur karen toh ummat ki ek badi tadaad usme mulawwis milegi,

pajaame, lungi, pant wagerah ka takhno se neeche pahanna ek aam baat ho gayi hai, ya yun samjh lijiye ki fashion ho gaya Hai,


be'namazion ka toh kahna hi kya ! Namazion par agar aap nazar daalen to aksariyat is jurm azeem me lath path nazar aayegi, aur iske chand asbaab hai,

unme se kuch ye hain

1- yahudi wa isaayi ke chalan ko baa'as fakhr samjhna

2- faishion me dewaana hona

3- mu'ashre ki malaamat ka khyaal karna, ya ye sochna ki ' duniya kya kahegi '

4- hadithon ki baatil taweel , yani bila'taqabbar aisa karne me koi harj nahi,


unhne asbaab ke bina par zaroori hai ke ham is mauzu par kuch tafseel se roshni daalenge taake gunah azeem ki haqiqat saamne aaye aur ham aapko iski artakaab se mahfooz kar saken



LIBAAS KI MUSTAHAB AUR AAKHIRI HADD :



zeil me sabse pahle wah hadisen pesh ki jaati hain, jinme libaas, lungi, wagerah ki pasandeedah (mustahab) aur uski aakhiri haddh bayaan ki gayi hai..


Hz abdullah bin umar (ra) ka bayaan hai ke :-"main rasoollullah sallalaho alaihi wasallam (pbuh) ke paas se guzra, Meri tah'band (zarurat se zyada) neechi thi, toh aap rasoollullah sallalaho alaihi wasallam (pbuh) ne farmaya :-" aiy abdullah apni lungi unchi karo", maine kuch aur uper kar li, phir aap rasoollullah sallalaho alaihi wasallam (pbuh) ne farmaya :-" aur zyadah unchi karo ", chunanche main iska hamesha khyaal karta raha yahan tak ke baaz logon ne kaha ke kahan tak ?? Farmaya:- " nisf pindaliyon tak "..

( sahih muslim kitabul libas 5462)


is hadith se malum huwa ke paayjaame aur lungi wagerah ka aadhi pindaliyon tak pahanna rasoollullah sallalaho alaihi wasallam (pbuh) ko zyada mahboob tha,

aur

hz huzaifa (ra) se riwayat hai ke rasoollullah sallalaho alaihi wasallam (pbuh) ne farmaya:-" lungi (wagerah) ki pasandeedah hadh nisf pindaliyon tak hai, agar tumhe ye gawaara na ho toh thodi aur unchi kar lo, aur us par bhi bas na ho toh pindaliyon ki aakhiri hadd tak rakho, lekin lungi (wagerah) ka koi hissa Takhno par ya zer e takhnah par rahna durust nahi hai"

(nisaai 5331, imam nisaai aur imam hakim ne sahih kaha hai)



is hadith par ghaur karne se pata chalta hai ke paajama lungi wagerah ka pasandeeda maqaam aadhi pindali hai, dusra darja uski kuch neeche ka hai, aur phir teesra darjah takhne se uper ka hai, lekin isse neeche latkaana durust nahi hai balke HARAAM hai,


hafiz ibne hajar asqalani (rh) farmate hain:-" ek hadh mustahab hai aur wah ye hai ke momin izar (lungi) aadhi pindaliyon tak pahanne par amal kare aur dusri hadh jawaaz ki hai, aur wah ye hai ke izar (lungi) ki aakhiri hadh takhno tak hai, yani takhne ke uper tak "


( fath ul bari 10/220)



TAKHNO SE NEECHE LIBAAS PAHANNE KI MANAAHI WA MUZAMMAT:



is qism me mukhtalif qism ki hadithen warid hui hain,


1- ALLAH KI NAZAR E MUHABBAT SE MAHROOMI


Libaas ko takhno se neeche pahanne waale ki taraf allah taala apni nazar e rahmat se nahi Dekhega.


Nabi akram rasoollullah sallalaho alaihi wasallam (pbuh) ne farmaya :-" allah taala uski taraf nazar nahi farmaayega jo izaar (lungi, pajama, pant wagerah) ko takhno se neeche tak latkaata hai"


(sunan nisaai bab asbaal izaar)


2- ALLAH TAALA KI NAZAR E RAHMAT, HAM KALAAMI AUR GUNAAHON KI SAFAAI SE MAHROOMI, AUR DARDNAAK AZAAB



Nabi e akram rasoollullah sallalaho alaihi wasallam (pbuh) ka irshaad giraami hai :-" teen qism ke logon se allah qayamat ke din na ham'qalaam hoga, na unki taraf nazar (rahmat) farmayega aur na hi unko gunaahon se paak wa saaf karega, aur unke liye dardnaak azaab hoga, ek wah shakhs jo libaas ko takhno se neeche latkaata hai, dusra ahsaan jataane waala, teesra jhooti qasam kha kar apna samaan bechne waala"

( muslim kitabul imaan, bab, bayan ghalat tahreem al asbaal hadith 493)


toh phir ek momin bande ko ye kaise gawaara hona chahiye ke wah koi aisa amal kare Jisse uska pyaar karne waala rabb usse ruth jaaye, usse ham kalaami band kar de, aur gunaaho se bojhal uske kandho ko azaad na kare,

balke rahmat ki jagah ghazab aur pyar ki jagah nafrat ki nigaah se dekha jaaye


3-GHUROOR WA GHAMAND SE LIBAAS TAKHNE SE NEECHE PAHANNA


Ye jurm is waqt zyada ba'as nafrat aur sabab e ghazab ho jaata hai jab aisa karne waala shakhs taqabbur aur fakhr ke taur par kare, kyonke allah taala ko taqabbar aur fakhr karne waala na'pasandeedah hai, aur jo shakhs apne libaas ko takhne se neeche pahanta hai uske dil ke kisi na kisi goshe me ghamand wa chalan zaroor chhupa hota hai..... Aise logon ko ghaur o fikr karna chahiye


hz abdullah bin umar (ra) se riwayat hai ke allah ke rasool sallalaho alaihi wasallam (pbuh) ne farmaya:-" jisne bhi shekhi aur takabbar ke taur par apne kapde ko zameen me ghaseeta, allah qayaamat me uski taraf nahi dekhega", hz abu bakr (ra) ne arz Kiya :-" agar main baar baar khyaal na karun to mere kapde ka ek kona ghaseet'ta rahta hai", toh aap rasoollullah sallalaho alaihi wasallam (pbuh) ne farmaya:-" aiy abu bakr tum aisa ghuroor ke taur par nahi karte "


( sahih bukhari kitab fazail e ashabul nabi sallalaho alaihi wasallam (pbuh), baad bab qaulun nabi sallalaho alaihi wasallam (pbuh) lu qunnat hadith 3220)



EK BAATIL SOCH(THINKING) KA JAWAAB AUR EK SHUBAH KA ILAAJ:



Yahi wah hadith hai jiski ghalat taweel karke ummat ka ek taqbah barelwiyyah ye kahta hai ke:

" bila taqabbar wa ghuroor ke takhne se neeche libaas latka lene me koi harj nahi, kyonki hadith me toh taqabbar wa ghuroor ki qaid lagi hai aur hamaare andar taqabbar nahi hai balke ek aam chalan ke taur par ham aisa karte hain, isliye hadith me mazkoor aid ham par aa'ed nahi hoti "


JAWAB:


iske mukhtalif jawab hain


pahla jawab ye hai ke is hadith me aur us maana ki dusri Hadith me mazkoor wa aa'eedon ko alag alag haalaton par mahmool karna chahiye... Jaise ke baaz halaat ka bayaan peeche guzar chuka hai,


dusra jawab ye hai ke, hz abu bakr (ra) ko nabi e akram sallalaho alaihi wasallam (pbuh) ne taqbbar aur ghamand se bari qaraar diya tha ,

toh kya aap ke liye bhi koyi aisi zamaanat hai jiski bina par aap apne ko taqabbar aur ghamand se paak qaraar de rahe hain ??

Balke hadith e rasool sallalaho alaihi wasallam (pbuh) ke saamne sar tasleem kham na karna waazeh hai ke dil me kuch marz hai jiski wajah se hadith ki taweel ki ja rahi hai...

Is silsile me musalmano ki ek jamaat badi deleri (bravery) se hadith me aayi hui tamaam tar aa'eedon ko ye kah kar nazar andaaz karti aur mazaaq udaati hai ke:- " ham in chhoti chhoti sunnaton ke chakkar me nahi padhte"........ NAOZUBILLAH...


Hamen toh hukumat e ilaahiya ke qayaam ki jaan tod koshish karni hai aur amli taur par Bhi is jamaat ke bade bade zimme daaraan iska namoona pesh karte hue nazar aate hain, yaani daardhiyan (beard) kaafi hadh tak kati aur chatti hui aur libaas takhno se neeche latakte hue....... (aisi soch se allah bachaaye)


teesra jawab ye hai ke mazkoorah taaweel baatil ki tardeed aur is shubah ka ilaaj khud hadith e rasool sallalaho alaihi wasallam (pbuh) ne kar di hai...


" libas ko takhne se neeche pahanne se bacho kyonke wah taqabbar ki alaamat hai "


(sunan abu dawood, al libaas, aur haakim ne ise sahih kaha hai, fath ul bari 10/312)


is hadith ne bilkul waazeh kar diya,

chunanche ab har qism ka shubah khatm ho jaana chahiye. Aur maan lena chahiye ke ye taqabbar ki alaamat hai


allah taala ka irshaad hai:


" bila'shubah momino ka ye tareeqa hona chahiye ke jab unhen allah aur rasool ki taraf faisle ke liye bulaaye jaaye toh unhe sam'ana aur at'ana kahna chahiye"

(Qur'aan)..


Chautha Jawab ye hai ke kya salaf (rh) ne bhi wahi maana samjha tha jo aaj ke aqali ghode daudaane waale samajh rahe hain ?? Aapko "nahi" me jawab milega


chunanche hz abdullah bin abbas (ra) har haal me zameen par izaar (libas) ghaseetne ko na'pasandeedah farmate they "

( fath ul bari 10/314)


hafiz ibn hajar asqalani (rh) ne fath ul bari me hz abu bakr bin al arabi (rh) ka qaul naqal kiya hai, wah farmate hain ke

" kisi shakhs ke liye jayez nahi ke apne kapde ko takhne se neeche pahne, aur iski taweel kare ke "mere andar ghamand nahi hai "


(fath ul bari 10/325)



GHUROOR WA GHAMAND SE LIBAAS TAKHNE SE NEECHE PAHANNE WAALA AADMI ZAMEEN ME DHANSA DIYA GAYA:



Uper jo aa'eed toh qayamat ke talluq se mutaallik hain,


albatta hadith me aise namoone bhi milte hain ke taqabbar ke saath libaas ko ghaseet kar chalne waale ko zameen me dhansa diya gaya..


Chunanche imam bukhari (rh) ne apni sahih me ye hadith Naqal ki hai

" hz saalim bin abdullah (ra) apne waalid se riwaayat karte hain ke rasoollulah sallalaho alaihi wasallam (pbuh) ne farmaya:-" ek shakhs izaar ghaseet'te hue taqabbar ke saath chal raha tha ke zameen me dhansa diya gaya, aur wah yaum e qayamat tak zameen me dhansta hi jaayega"

( rawaah bukhaari, kitabul libaas bab min jarshu'bah khaila 5790)



zara ghaur farmayen ke duniya hi me is gunaah ka ye anjaam huwa, ye waqeya qayamat tak ke logon ke liye ibrat aur sabaq liye hue hai,

jabke allah ki rahmat ye hai ke wah apne bandon ko gunaahon ki saza fauran nahi deta, lekin kabhi kabhi ibrat ke liye kisi ko fauran saza bhi di jaati hai taake log usse nasihat haasil karen,


allah taala ghamand wa taqabbar karne waale ko pasand nahi farmata


hz mugheera bin shoiba (ra) farmate hain ke rasoollullah sallalaho alaihi wasallam (pbuh) ne sufyan bin sahal (ra) ki chaadar pakad kar farmaya:-" aiy Sufiyaan asbaal (taqabbar ghamand) na karo kyonke allah asbaal karne waalon ko pasand nahi karta"


zara ghaur farmaayen ke rasoollullah sallalaho alaihi wasallam (pbuh) ne sahabi ko allah taala ki muhabbat ka waasta diya ke tumhaar ye amal tumhare mabood e haqeeqi aur pyaar karne waale rab ko pasand nahi,


kya hamen allah ki muhabbat wa chahat ki zaroorat nahi ?

Hamen chahiye ke un tamaam aamaal se kinaara kash ho jaayen jo allah ko na'pasandeedh ho,

bil'khusoos taqabbar wa ghamand se..


Allah ham sabko taufeeq ada farmaaye... Ameen



TAKHNO SE NEECHE LIBAAS SE DHAKA RAHNE WAALA HISSA AAG ME JALEGA!!!



Hz abu hurairah (ra) riwayat karte hain ke nabi e akram sallalaho alaihi wasallam (pbuh) ne farmaya :-" takhno ka jo hissa izaar se dhaka hoga wah aag me daakhil hoga"


(bukhari kitabul libaas 5787)


aiy momin bande ! Ek taraf ahle duniya ki malaamat hai, logon ki taana zani hai, doston se aar Hai, muashre ka lihaaz hai, faishion aur nayi tahzeeb ki chamak damak hai aur yahud wa nasaara ki itaat guzaari hai aur dusri taraf allah ki naraazgi hai, dardnaak azaab hai, nazar e rahmat se mahroomi, naar jahannum ki dhamki aur nabi e akram sallalaho alaihi wasallam (pbuh) ki naafarmaani !!!

Dekh aakhir tujhe kya pasand hai ?? Aajizi duniya ki bahaaren aur ahle duniya aur doston wa ahbaab ki khus'noodi ya rabb ka ghazab aur aakhirat ki holnaaki wa azaab ???


NAMAZ AUR TAKHNO SE NEECHE LIBAAS :



Yun toh libaas ko takhno se neeche pahanna ek azeem jurm hai, lekin ye jurm us waqt aur bhayanak ho jaata hai jab haalat e namaz me bhi is par asar rahe..

Jabke allah taala ne qur'aan kareem me salaat ki sifat ye batlaayi hai ke:-" salaat fahas aur buri baaton se rok deti hai"

(ankaboot 45)


aise logon ko allah se darna chahiye aur apni nigaahon ke saamne nabi e akram sallalaho alaihi wasallam (pbuh) Ki wa'ed par nazar rakhna chahiye

" haalat e namaz me libas ko takhne se neeche latkaane wala allah taala k haraam wa halaal par imaan nahi rakhta aur allah k deen me uska kuch hissa nahi hota"

(abu dawood kitabul libas ba'sanad hasan, fath ul bari 10/317)


ham namazion ko is shakht waeed(huqm) par karte hue is gunaah ke artekaab se baaz aa jaana chahiye..

Haasil e kalaam ye hai ke takhne se neeche libaas pahanna gunaah e kabeera hai, aur duniya wa aakhirat dono me allah ke ghazab wa aitaab ka baa'as bhi hai,

lihaaza hamen duniya ki malaamat ka khauff nahi karna chahiye, na mu'ashre ke aar ki fikr karni chahiye, na hi ghairon ki TAQLEED ke ham diwaane bane, na faishion ki leharon me bahein aur na hi dost wa ahbaab ki taana zani ki parwaah karen..

Balke pahli fursat me hamen is gunaah ki tauba kar leni chahiye...

Allah taala hamen aur bhaiyon ko is azeem jurm ko tark karne ki taufeeq ata farmaye... AMEEN